ភ្នំពេញ៖ អង្គការទស្សនៈពិភពលោកថាក្នុងអំឡុងពេលប្រឈមនឹងវិបត្តិកូវីដ-១៩ ដែលសាលាត្រូវបានបិទ កម្មវិធីបណ្ណាល័យចល័តរបស់ខ្លួន បាននឹងកំពុងដើរតួយ៉ាងសំខាន់ក្នុងការជំរុញទម្លាប់អានរបស់កុមារ។

អង្គការទស្សនៈពិភពលោកឱ្យដឹងថា កម្មវិធីបណ្ណាល័យចល័តរបស់អង្គការនេះ កំពុងជំរុញដល់កុមារក្នុងការអាន និងស្វ័យសិក្សារបស់ពួកគេ តាមរយៈការចុះតាមភូមិក្នុងសាលាគោលដៅក្នុងមួយសប្ដាហ៍ម្ដង ដើម្បីយកសៀវភៅទៅឱ្យកុមារនៅក្នុងភូមិខ្ចី ក៏ដូចជាជំរុញឱ្យឪពុកម្ដាយរបស់កុមារតាមដាន ជួយបង្រៀន និងលើកទឹកចិត្តកូនរបស់ខ្លួនឱ្យរៀន នៅពេលទំនេរពីការងារ។

ប្រធានបច្ចេកទេសកម្មវិធីអប់រំនៃអង្គការទស្សនៈពិភពលោកអន្តរជាតិនៅកម្ពុជាលោក វ៉ា សុរិន បានថ្លែងថា៖ « បណ្ណាល័យចល័ត បាននឹងកំពុងជួយជំរុញដល់ការអាន និងស្វ័យសិក្សារបស់កុមារ ជាពិសេសកុមារដែលមិនមានសម្ភារៈសិក្សាគ្រប់គ្រាន់។ ពួកគេអាចខ្ចី សៀវភៅរឿង សៀវភៅចំណេះដឹងទូទៅ ដើម្បីយកទៅអាន ឬរៀននៅផ្ទះ » ។

បើតាមអង្គការទស្សនៈពិភពលោក កម្មវិធីបណ្ណាល័យចល័តរបស់អង្គការនេះ ត្រូវបានបង្កើតឡើងចាប់ពី ខែមីនា ឆ្នាំ២០២១ ក្នុងពេលដែលសាលានានានៅកម្ពុជាត្រូវបិទទ្វាដើម្បីទប់ស្កាត់ការរាតត្បាតនៃជំងឺកូវីដ-១៩។

រហូតមកដល់ពេលនេះ កម្មវិធីបណ្ណាល័យចល័ត បានសហការជាមួយសាលាចំនួន ៥៣២ ដែលបានជួយដល់កុមារប្រមាណ១១ម៉ឺននាក់ នៅក្នុងស្រុកចំនួន៣០ នៃខេត្តចំនួន៩ បានទទួលឱកាសនៃការអានសៀវភៅ៕